Dünya əhəmiyyətli tarixi və memarlıq abidəsi olan Şəki Xan Sarayı xalq yaşayış evlərinin sadə və funksional cizgilərini özündə əks etdirməklə yanaşı, Qafqazda XVIII əsr memarlığının ən gözəl nümunəsi, İslam Şərqinin memarlıq incilərindən biri hesab olunur. 1762-ci ildə Məhəmmədhüseyn xan Müştaqın hakimiyyəti dövründə istifadəyə verilmiş bu möhtəşəm saray iki mərtəbəli quruluşu və estetik baxımdan simmetrik kompozisiya həlli ilə diqqət çəkir.

      Sarayı fərqləndirən əsas xüsusiyyətlərdən biri onun zəngin dekorativ interyeridir. Otaqların divar və tavan rəsmləri canlı rəngləri, rəmzi mənaları ilə insanı heyran edir. Rəngarəng şüşələrdən hazırlanmış şəbəkə pəncərələr sarayın fasadına estetik cazibə qataraq onu işıq və rəng harmoniyası ilə zənginləşdirir. Sarayın cənuba yönəlmiş baş fasadı tamamilə şəbəkə pəncərələrlə örtülmüş, bu da binanın dekorativ və havalı görünüşünü təmin etmişdir. Fasadın polixrom rəngləri, gəc üzərində işlənmiş oyma naxışlar interyerdə olan süjetli, həndəsi və nəbati divar rəsmləri ilə birləşərək binaya həm incəlik, həm də tarixi dərinlik bəxş etmişdir.