Azərbaycanın qədim şəhərlərindən biri olan Şəki tarixi və memarlıq abidələri, vizual görünüşü, təbiət və insan quruculuğunun vəhdətindən təşkil olunmuş bir ansambla bənzəyir. Elə bu səbəbdəndir ki, Rerix paktı, Afina xartiyası kimi tarixi memarlığı qorumağın vacibliyini vurğulayan xüsusi qərarların təşviqi ilə dünyada başlayan tarixi, bədii, memarlıq qoruqlarının yaranması ənənəsi Şəki şəhərindən də yan keçməmişdir. Azərbərbaycan SSR Nazirlər Soveti 24 noyabr 1967 ci il tarixində Nuxa (Şəki ) şəhərində tarixi abidələrin qorunması və mühafizə olunması haqqında 594 №li qərar qəbul etmişdir. Hazırda Şəki "Yuxarı Baş" Milli Tarix Memarlıq Qoruğu təqribən 300 hektar ərazini əhatə edir və onun sərhədləri daxilində dövlət tərəfindən qeydiyyata alınmış 83 tarixi memarlıq abidəsi və qoruğun özü bütöv olaraq mühafizə olunur.

Şəki "Yuxarı Baş" Milli Tarix Memarlıq Qoruğu Azərbaycan Respublikası Dövlət Turizm Agentliyi Qoruqları İdarəetmə Mərkəzinin tabeliyində fəaliyyət göstərir. 07 iyun 2019 cu ildə, UNESCO nun Bakıda keçirilən 43- cü sessiyasında Qoruğun ərazisinə daxil olan Şəkinin Tarixi Mərkəzi Şəki  Xan sarayı ilə birlikdə  “Dünya Mədəni İrsi” Siyahısına daxil edilmişdir.